Kaunatys vītu vuordu stuosti – filmā!
Ceturtdien, 5.decembrī, plkst.14.00 stuņdēs Kaunatys kulturys nomā nūtiks diska "Kaunatys vītu vuordu stuosti" prezentaceja. Vysi ineteresenti aicynuoti iz kūpeigu filmys nūsavēršonu, byus sarunys ar teiciejim i ekspedicejis dalinīkim pi kūpeiga peirāga.
Filmys pamatā ir 2012. goda folklorys ekspedicejis materiali, kas pamatā vuokti Kaunatys apleicīnē. Filma turpynoj Rēzeknis Augstškolys (RA) izdavumu tradiceju, stuostūt par kaidu nu folklorys žanrim, izmantojūt myusdīneigys mediju īspiejis, kai ari raksturojūt kaidys konkretys Latglolys vītys folkloriskuos i kulturviesturiskuos tradicejis. Žanriskais īrūbežūjums beja teikys i legendys. Diskā ir raudzeits paruodeit vītejū īdzeivuotuoju attīksmi pret dzymtū vītu, maklātys atbiļdis iz vītu vuordu uzdūtojom meiklem, uzklauseitys teikys i nūstuosti par Latgolai svareigim geografiskajim objektim – Rāznys azaru, Muokūņkolnu, Lelū Līpu kolnu, Dzierkaļu kolnu – ruodeita tūs nūzeime Latgolys kulturys telpā.
Disks "Kaunatys vītu vuordi stuosti" tiks duovynuots gon pošam pogostam, gon ari teiciejim, kas sasadarbuova folklorys praksis laikā ar RA studentim i docātuojim. Arī Latgolys školys, bibliotekys un muzeji filmu par Kaunatu varēs izmantuot kai bilingvalu izzinis i muoceibu materialu un paleigleidzekli Kaunatys i tuos apleicīnis vītu vuordu, nūstuostu, teiku izzynuošonai.
Kaunatīšu folklorys materiali tyks izvītuoti ari RA sātys lopā (http:folklora.ru.lv). Kūpumā savuoktys gondreiž 1500 folklorys vīneibys, tymā skaitā, nūstuosti, anekdotis, puorsokys (506), dažaidi tautys tradiceju aproksti (134), parunys, sokomī vuordi, meiklis (193), tautys magijis vāruojumi (76) i dzīšmu folklora (408). Par ekspedicejis laikā kuriozim smaids iz lyupom pasaruoda vēļ tān. Ir svareigi naizsvīst, nasadadzynuot, naaizmierst sovys jauneibys atminis, dzeivis pīredzi, pīraksteituos klades, ar kotru godu tū vierteiba kļyust arviņ leluoka. Dzīsmis, dejis, rūtaļis, receptis, teikys un nūstuosti – kotrs nu žanrim sovā veidā ļauj cylvākim īpazeit tyvuok vīnam ūtru, saglobuot kultūrviesturiskū mantuojumu, bet pats svareiguokais – izdzeivuot latgaliskū dzeivis ziņu.
Lels paļdis kaunatīšim par jaukū vosoru! I paļdis par finansialū atbolstu RA i vaļsts pietejumu programai "Nacionaluo ideņtitate".
Uz sarakstu
